आउँदैछ पाँच हाईड्रोपावर कम्पनीको साढे दुई अर्बको शेयर, कुन कुन कम्पनीले कहिले ल्याउँदैछन् ?
एक पछि अर्को गर्दै साधारण शेयर निष्काशन गर्ने क्रम बढ्दो अवस्थामा छ । यहि क्रममा ५ वटा जलविद्युत आयोजनाहरुले चाँडै नै देशभरीका सर्वसाधारणका लागि ठुलो संख्यामा साधारण शेयर निष्काशन गर्ने तयारी गरेका छन् । ५ वटा जलविद्युत कम्पनीले मात्र सर्वसाधारणका लागि अढाई करोड कित्ता साधारण शेयर निष्काशन गर्ने तयारी गरेका छन् । जसमा दशैं लगत्तै जलविद्युत लगानी तथा विकास कम्पनीले २ अर्वको साधारण शेयर निष्काशन गर्दैछ ।
दशैं अघि नै आब्हान पत्र जारी गर्ने तयारी गरेको जलविद्युत लगानी तथा विकास कम्पनीले अन्तत दशैं लगत्तै २ अर्व रुपैंयाको साधारण शेयर निष्काशन गर्ने भएको छ । यसका लागि उसले धितोपत्र बोर्डबाट २ साता पहिले अन्तिम स्वीकृति पाइसकेको छ ।
त्यसै गरि अन्य ४ वटा साना जलविद्युत आयोजनाले ४२ लाख कित्ता साधारण शेयर निष्काशनको क्रमलाई तिब्र बनाएका छन् । यस क्रममा केही दिन पहिले मात्र खानीखोला जलविद्युत आयोजनाले इक्रा रेटिंग ४ पाएको छ भने अन्य ३ कम्पनीले पनि रेटिंग पाउने समय नजिकिंदै गएको छ । यी चार कम्पनीले बढीमा ५ महिना भित्रमा साधारण शेयर निष्काशन गर्ने तयारी गरिरहेका छन् ।
जलविद्युत लगानी तथा विकास कम्पनी
सामूहिक लगानी कोषहरुलाई छुट्ट्याइएको १० लाख कित्ता सेयर बाँडफाँड गरेको कम्पनीले दशैं अगाडी नै साधारण शेयर निष्काशन गर्ने तयारी गरे पनि त्यसले पुर्णता पाउन सकेन । जलबिद्युत बिकास कम्पनीको शेयर बिक्रीको मुख्य काम गर्ने नागरिक लगानी कोषले सामुहिक लगानी कोषहरुका लागि ब्यवस्था गरिएको ५ प्रतिशत शेयर भने केही दिन अघि बाँडफाँड गरिसकेको छ ।
जलबिद्युत बिकास कम्पनीले जारी गर्न लागेको दुई अर्ब रुपैयाँको २ करोड कित्ता मध्ये ५ प्रतिशतले हुने १० लाख कित्ता सामुहिक लगानी कोषहरुले प्राप्त गरेका छन् । बाँकी रहेको एक करोड ९० लाख कित्ता सेयर कम्पनीका कर्मचारीसहित सर्वसाधारणको लागि कात्तिक दास्रो साता निष्काशन गर्ने नागरिक लगानी कोषले जनाएको छ ।
कम्पनीको शेयर निष्कासन तथा बिक्री प्रबन्धक नागरिक लगानी कोष, सह निष्कासन तथा बिक्री प्रबन्धक एनसिएम मर्चेन्ट बैङ्किङ तथा एनएमवी क्यापिटल लिमिटेड रहेका छन् ।
खानीखोला जलविद्युत कम्पनी
खानीखोला जलविद्युत् कम्पनीले १३ लाख ९७ हजार १ सय ४३ कित्ता साधारण शेयर निष्काशनको करिब करिब अन्तिम चरणमा पुगेको छ । यस क्रममा उसले इक्राबाट ग्रेड ४ रेटिङ पाएको छ । ६ दशमलव ३६ मेगावाट क्षमताको यो आयोजनाको ७५ प्रतिशत काम सम्पन्न भइसकेको छ । यसमा प्रभु बैङ्कको ३ करोड २६ लाख रुपैंया लगानी रहेको छ ।
थोसे खोलाबाट ४ दशमलव ३६ मेगावाट र क्यास्केड आयोजना अन्तर्गत ललितपुर भट्टेडाँडाबाट २ मेगावाट गरि कम्पनीले ६ दशमलव ३६ मेगावाट विद्युत उत्पादन गर्न लागेको हो । वर्षयाममा प्रतियुनिट ४ रुपैयाँ ८० पैसा र सुक्खा यामका लागि ८ रुपैयाँ ४ पैसाको दरमा नेपाल विद्युत प्राधिकरणसँग कम्पनीले विद्युत् विक्री सम्झौता गरिसकेको छ ।
कम्पनीको शेयर निष्काशन तथा बिक्री प्रबन्धक सिभिल क्यापिटलका अनुसार तिहार पछि आयोजना प्रभावित स्थानीयका लागि एक तिहाई साधारण शेयर निष्काशन हुने छ । त्यस पछि सर्वसाधारणका लागि २ तिहाई साधारण शेयर निष्काशन हुने छ ।
ङ्यादी ग्रुप पावर
अहिले नै निर्माण सम्पन्न गरि नियमित रुपमा ५ मेगावाट विद्युत उत्पादन गर्न थालिसकेको ङ्यादी ग्रुप पावर लिमिटेडले सर्वसाधारणका लागि १४ लाख ६० हजार ६ सय ५ कित्ता साधारण शेयर निष्काशन गर्न लागेको हो ।
एनआइबीएल क्यापिटलका महाप्रबन्धक मेखबहादुर थापाका अनुसार धितोपत्र बोर्डले आवश्यक प्रकृया छिटो टुङ्गो लगाइदिए छिटो भन्दा छिटो आइपीओ जारी हुने छ । जलविद्युत आयोजनाको लागत ४८ करोड ७० लाख रुपैंयाको हाराहारीमा छ । जस मध्ये ३० प्रतिशत बराबरको हिस्सा सर्वसाधारणका लागि छुट्याएर कम्पनीले १४ करोड ६० लाख रुपैंया बराबरको आइपीओ जारी गर्न लागेको हो ।
कम्पनीका अनुसार छिटो भन्दा छिटो साधारण शेयर निष्काशन गर्ने तयारी भैरहेको छ । उता कम्पनीको शेयर निष्काशन तथा बिक्रि प्रबन्धकले माघको मध्यसम्मा साधारण शेयर निष्काशन भैसक्ने जनाएको छ । आयोजना लमजुङ जिल्लामा सञ्चालनमा छ ।
गज्र्याङ हाइड्रो पावर
गज्र्याङ हाइड्रो पावर कम्पनी अन्तरगतको २ दशमलव ८३ मेगावाटको चाके खोला जलविद्युत आयोजनाको ५ लाख २२ हजार कित्ता साधारण शेयर पनि आउने तयारीमा छ । रामेछापको चुचुरे गाविसमा निर्माणधीन जलविद्युत आयोजनाको कुल लागत ४७ करोड ९२ लाख रुपैंया रहेको छ । ५ लाख २२ हजार मध्ये कम्पनीले १ लाख ७४ हजार २ सय कित्ता शेयर स्थानीय र बाँकी ३ लाख ४८ हजार ४ सय कित्ता शेयर सर्वसाधारणका लागि बितरण गर्न लागेको हो ।
कुल ४७ करोड लागत रहेको आयोजनामा सर्वसाधारणको ५ करोड २२ लाख, प्रवद्र्धकको १२ करोड १९ लाख ४० हजार रुपैंया लगानी रहने छ भने बाँकी ३० करोड ५० लाख रुपैंयाका लागि कम्पनीले नेपाल बैंक र प्रभु बैंकसंग कर्जा सम्झौता गरि सकेको छ । कम्पनीको शेयर निष्काशन तथा बिक्रि प्रबन्धक एनआइबीएल क्यापिटल रहेको छ ।
छ्याङदी हाइड्रो पावर
छ्याङदी हाइड्रो पावर कम्पनीले ७ लाख २० हजार कित्ता साधारण शेयर निष्काशनको तयार गरिरहेको छ । यसका लागि कम्पनीले धितोपत्र बोर्डमा आवेदन दिइ सकेको छ । ईक्रा रेटिड. पाउन केही समय लाग्ने भएकाले साधारण शेयर निष्काशनका लागि बढीमा ६ महिना समय लाग्ने कम्पनीले जनाएको छ ।
लमजुङकोे फलेनी र वन्सार गाविसको मध्य भागमा रहेको छन्दी खोलामा निर्माणधीन २ मेगावाटको जलविद्युत आयोजनाले निकट भविष्यमै विद्युत उत्पादन गर्ने लक्ष्य सहित निर्माण कार्य गरिरहेको छ । कम्पनीका कार्यकारी सञ्चालक एलबी थापाका अनुसार धितोपत्र बोर्डले कुनै ढिलासुस्ती नगरे ४ महिना भित्रमा आइपीओ जारी हुनेछ । ७ लाख २० हजार कित्ता मध्येबाट नै स्थानीयलाई पनि शेयर बितरण गर्ने कम्पनीको तयारी छ । यो जलविद्युत आयोजनाको चुक्ता पूँजीको करोड हो ।
कम्पनीको शेयर निष्काशन तथा बिक्रि प्रबन्धक ग्लोबल आइएमई क्यापिटल रहेको छ । नेपाल धितोपत्र बोर्डमा साधारण शेयर निष्काशनका लागि आवेदन दिएका कम्पनीको अहिलेको अवस्था हेर्न यहाँ क्लिक गर्नुहोस् ।
साभार : merolagani.com
No comments:
Post a Comment